News

Verkefni haustsins

11.09.2017

 

Fjölmörg verkefni eru í vinnslu hjá Þekkingarsetrinu um þessa mundir, þar á meðal hagnýtt rannsóknarverkefni ,,Bridging textiles to the digital future" og heimsóknir listamanna í skóla á Norðurlandi vestra. 

 

 

Þann 1. september 2017 hófst hagnýtt rannsóknarverkefni Bridging Textiles to the Digital Future". Um er að ræða samstarfsverkefni Þekkingarsetursins og Textílsetur Íslands. Í því felst m.a. skráning á vefnaðarmunstrum sem tilheyra Vinum Kvennaskólans, Textílsetri Íslands o.fl. í rafrænan gagnagrunn, uppsetning vefsvæðis þar sem munstrin verða aðgengileg fyrir textíllistamenn, hönnuði og nemendur á sviði textíls og miðlun sérþekkingar á TC2 rafrænum vefstól sem staðsettur er í Kvennaskólanum. Verkefnið er áætlað til þriggja ára og hlaut styrk frá Tækniþróunarsjóði Rannís í apríl 2017. Ragnheiður Björk Þórsdóttir vefnaðakennari og veflistamaður hefur aðalumsjón með verkefninu. Hún mun kynna verkefnið og TC2 vefstólinn á ráðstefnu Nordic Textile Art í Borås í Svíþjóð nú í september. 

 

Verið er að vinna í undirbúning að heimsóknum listamanna í skóla á Norðurlandi vestra. Það er afrakstur verkefnisins ,,Aukið samstarf listamanna/listamiðstöðva og fræðslustofnana á Norðurlandi vestra" á vegum SSNV. Markmiðin eru að efla samstarf milli listamiðstöðva, sem starfræktar eru á Blönduósi og Skagaströnd, við skólastofnanir á svæðinu. Einnig verður nemendum gefið tækifæri að kynnast fjölbreytileika listanna og lista frá ólíkum menningarheimum.  Í lífsháttakönnun sem gerð var árið 2013 meðal nemenda 8.-10. bekkjar á Norðurlandi vestra kom fram sérstaklega mikill áhugi á listmenntun. Í verkefninu felast heimsóknir listamanna í skóla í Austur-Húnavatnssýslu haustið 2017.

 

Textíllistamiðstöð í Kvennaskólanum hefur verið samstarfsverkefni Þekkingarsetursins og Textílsetursins siðan 2012. Samstarfsaðilarnir hlutu styrk frá Kulturkontakt Nord í mars 2016 til verkefnisins Nordic-Baltic Scholarship Program. Styrkur er veittur til tveggja ára og gerir þeim kleift að bjóða listamönnum frá Norðurlöndum og Eistnesku löndum að koma og dvelja í textíllistamiðstöðinni í Kvennaskólanum tvo mánuði í senn. Þrír listamenn hafa komið á vegum styrksins nú þegar: Baiba Osiite frá Lettlandi dvaldi í listamiðstöðinni í nóvember og desember 2016 og kenndi á námskeiði í silkimálun. Kerstin Lindström frá Sviðþjóð kom í júní og júlí og var með prjónagjörninginn, ,,Own your own time" á Prjónagleði 2017. Päivi Vaarula frá Finlandi dvaldi í listamiðstöðinni í júlí og ágúst og kenndi námskeið í jurtalitun á Húnavöku.  Nýlega hefur verið auglýst eftir fjórða og síðasta styrkþega. 

 

Væntanlega eru tveir nemendur Håndarbejdes Fremmes UCC í Danmörku og dvelja þær í tvo mánuði í lok árs. Einnig er í vinnslu dvöl nemenda frá Concordia háskóla í Kanada, en hópurinn mun dvelja í listamiðstöðinni í júní 2018. Nemendur munu fá kennslu frá textílsérfræðingum í Kvennaskólanum, Ragnheiðar Bjarkar Þórsdóttur og Jóhönnu E. Pálmadóttur. 

 

Þekkingarsetur tekur þátt í verkefninu ArtEnVaff / The IceView. Það er tímarit um bókmenntir og listir sem fjallar um verk rithöfunda og listamanna, sem ferðast til Íslands, í sköpunarhugleiðingum. Tímaritið er óháð og ekki gefið út í hagnaðarskyni. Það miðlar reynslu listamanna af dvöl þeirra á Íslandi með viðtölum, myndum af listaverkum auk þess að birta ritverk þeirra. Verkefni er hugmynd Katie Brown, listakonu og rithöfundar. Þekkingarsetrið, Textílsetur Íslands og Nes listamiðstöð á Skagaströnd eru samstarfsaðilar verkefnisins, en það hlaut styrk frá Uppbyggingasjóði 2016 og 2017. Fyrsta tölublaðið kom út maí 2017. Önnur útgáfu er í vinnslu. 

 

Þar að auki sinna starfsmenn Þekkingarsetursins Námsveri í Kvennaskólanum og sitja yfir prófum nemenda í fjarnámi.